បាងកក: នៅថ្ងៃពុធ ទី១៦ ខែមិថុនា ឆ្នាំ២០២១ នាយករដ្ឋមន្ត្រីថៃបានប្រកាសថាប្រទេសថៃគ្រោងនឹងបើកព្រំដែនរបស់ខ្លួនឡើងវិញ សម្រាប់ភ្ញៀវទេសចរអន្តរជាតិក្នុងរយៈពេល១២០ថ្ងៃទៀត។

លោក ប្រាយុទ្ធ ចាន់អូចា បានបញ្ចាក់ថា «ឥឡូវនេះវាដល់ពេលដែលយើងត្រូវសំឡឹងមើលទៅអនាគត និងបើកប្រទេសនេះឡើងវិញដើម្បីស្វាគមន៍ភ្ញៀវទេសចរអន្តរជាតិឲ្យត្រឡប់មកប្រទេសថៃម្តងទៀត។ នេះជាមធ្យោបាយដ៏សំខាន់មួយដើម្បីកាត់បន្ថយការលំបាក ដែលប្រជាជនមិនអាចរកចំណូលបានជាយូរមកហើយ»។

លោក ប្រាយុទ្ធ ចាន់អូចា បានបន្តថា «ថ្ងៃនេះខ្ញុំសូមជូនដំណឹងខ្ញុំមានគម្រោងបើកប្រទេសថៃបើកឡើងវិញ ក្នុងរយៈពេល១២០ថ្ងៃទៀតដោយរាប់ចាប់ពីថ្ងៃនេះតទៅ»។

លោក ប្រាយុទ្ធ ចាន់អូចា ក៏បានអំពាវនាវដល់គោលដៅទេសចរណ៍សំខាន់ៗ ឱ្យបើកដំណើរការឡើងវិញឆាប់ៗនេះ ប្រសិនបើពួកគេត្រៀមខ្លួនរួចជាស្រេច នឹងសម្រាប់អ្នកដំណើរដែលបានចាក់វ៉ាក់សាំងបង្ការជំងឺកូវីដ-១៩ហើយ នឹងត្រូវបានរួចផុតពីការធ្វើចត្តាឡីស័ក៕

^{ប្រភព: CNA}